قصيدة جورج منصور في الذكرى السنوية الأولى لرحيل رفيق دربه بطرس عنداري

الى روح بطرس عنداري في ذكراه السنوية الأولى
ـ1ـ
سألت السنه وإيامها ل راحو
وين خبّيتي حبيب القوم؟
قالت.. وقلبي لمست جراحو
لا تلومني.. جرحك وجرحي توم
سكوت الجرح أفضل من الناحو
سكوت الدمع هوّي الوجع واللوم
بطرس رحل ما رحلت جناحو
كل يوم بترفرف حوالينا
ما غاب عنّا لا سنه ولا يوم
ـ2ـ
سألت السنه عن غصّة المنضام
كَنّا بتعرف نيّة القاضي
ل من غير عدل بيصدر الأحكام
أحكام فيها ع الوعي قاضي
الايّام سادا بغيبة المقدام
لا العلم راضي ولا الأدب راضي
فاضيه عنتمرق الايام
مش وحدها؟.. حتى العمر فاضي
ـ3ـ
من يوم ما نجم الصحافه غاب
ومش عادتو يطوّل بغيباتو
اشتاقو عليه الأهل والأحباب
والجاليه اشتاقت لطلاتو
اشتاقو الصحافيين والكتّاب
اشتاقو لغمزاتو ولقفشاتو
مار بطرس لبطرس فتحلو الباب
وما عاد قري مار بولس رساله
مشغول عنيقرا مقالاتو
ـ4ـ
يا بطرس الصخره الما بتهتز
بيجوز تزحل بس ما بترحل
لبنان فيك بيكبر بيعتزّ
ما بتسمعو غير عنّك بيسأل
وجرح البقلبي عليك بدّو ينز
بركي لعندك صرختي بتوصل
يا حامل المشعل زمان العز
ولّى الزمان وعتّم المشعل
ـ5ـ
شو بخبرك ب هالسنه ما صار
لا نهار يرضينا ولا ليله
وكلما عليي طل فجر نهار
بيغرق نهاري ب بحر ليلي
ولميا اللي بعدو قلبها ع نار
وبتولول وبتقول يا ويلي
ومع كل هيدا حافظه الأسرار
ومحافظه ع البيت والعيله
ـ6ـ
بعدنا بنتذكّر لياليك
والذكريات مكبّشي فينا
والحاضر حكايات عن ماضيك
موجات ع شاطي أمانينا
وعم نلتقي ع كل تزكه فيك
وكاسات تشرب من مآقينا
ما في سنين بتقدر تنسّيك
ولا في زمن يقدر ينسّينا
جورج منصور